А в се же лѣто Всеслав рать почал. В си же времена бысть знамение: на западѣ звѣзда велика, лучя имущи кровавы, всходяще с вечера по заходѣ солнчнѣмь, и пребысть за 7 днии. Се же проявляшеся не на добро; по сем бо быша усобица многа и нашествие поганых на Русскую землю; се бо звѣзда бѣ аки кровава, проявляющи кровопролитие. В си же времена бысть дѣтищ ввержен в Сѣтомль; егоже дѣтища вывлекошя рыболове в неводѣ, егоже позоровахом до вечера, и паки ввергоша и в воду, бяшет бо сиць: на лици ему срамнии удове, а иного нелзѣ сказати срама ради. Пред сим же временемъ и солнце премѣнися, и не бысть свѣтло, но яко месяць бысть, егоже невегласи глаголють снѣдаему сущу. Се же бывают сицева знамениа не на добро; мы бо по сему разумехом, якоже древле при Антиосѣ въ Иерусалимѣ, и лучися внезапу по всему граду за 40 днии являтися на въздусѣ на коних рыщущимъ въ оружьи, златы имущи одежди, и плъкы обоя являемы, и оружиемь двизающимся: се же проявляше нахожение Антиохово, нашествие рати на Иерусалимь. По сем же при Неронѣ цари в том же Иерусалимѣ възсиа звѣзда въ образ копеиныи над градомъ: се же проявляше нахожение рати от римлян. И пакы сице же бысть при Иустианѣ цари, звѣзда възсиа на западѣ, испущающи лучя, юже прозываху блисталницу, и бысть блистающи 20 днии, по сем же бысть звѣздамь течение с вечера до утриа, и мнѣти всѣмь, яко падают звѣзды; и пакы солнце без лучь сиаше; по сем бо крамолы человекомъ и умертвиа бяше. Пакы же при Маврикии цари бысть сице: жена дѣтищь роди без очию и без руку, в чреслех бѣ ему рыбеи хвостъ прирослъ; песъ родися о 6 ногъ; въ Африкии же два дѣтища родистася: единъ о 4 ногах, а другыи о двою главу. По сем же бысть при Констянтинѣ иконоборци, сына Леонова: течение звѣздное бысть на небеси, оттръгаху бо ся на землю, яко видящимь имъ мнѣти кончину сущу; тогда же и въздухъ възниася повелику; в Сирии же бысть трус велик, земли разсѣдшися 3 дни и поприщь, и изыде дивно из земли, мска человечьскым гласомь глаголющи, проповѣдающи нашествие язык; еже и бысть, наидошя бо срачини на землю Палестинскую. Знамениа бо в небеси, или въ звѣздах, или в солнци, или птицами, или инѣмь чимъ, не на благо бываеть; но знамениа такова на зло бывают: ли проявление рати, ли глад, или смерть проявляеть.

О ПРЕНЕСЕНИИ МОЩЕМЪ ЧЮДОТВОРЦА НЫКОЛЫ ОТЪ МИРЪ ВЪ БАРЪ ГРАДЪ, въ лѣто 6596 [1088], мѣсяца маиа въ 9 день. Присно убо длъжны есми, братие, праздникы Божиа въ честь дрьжаты, подобити же ся святымъ его, и подвижно искати спасениа, присно испытавши ся, како по образу Божию сътворены быхомъ, угоднаа предъ нимъ сътворше, якоже блаженныи сътвори, великии и словущии архиепископь Христовь Николае, егоже трапезы нынѣ хощу вамь представити, отъ неаже вькусите и видите, яко благь Господь. Благъ Господь уповающимъ на нь, благь Господь надѣющимся на нь, благь Господь любящимъ его, благь Господь творящимъ волю его, иже бѣ далъ Мирьскому граду и области ихъ, своа щедроты излиа на ня, и чюдеса творя дивнаа, исцѣлениа неоскуднаа даа, сущимъ въ напастехъ велии помощникь и заступникь показася по суху же и по морю, болныа исцѣляа, плѣнныа избавляа, слѣпымъ прозрѣние даа, хромымъ хождение, глухымъ слышати, прокаженыа очищаа, бѣсы изгоняа, и всѣмъ всякъ, якоже рече Господь: "Вѣруаи въ мя, дѣла, яже азъ творю, и тои сътворить; якоже и сии угодникь его, святыи архиереи великии Николае. Егда же благоволи благодать, и человѣколюбие въсиа на ны, праведному солнцу въсиаты на ны и благодати отъ Владыкы Вседрьжителя, показа имъ въ нынѣшнея времена, въ дни и въ лѣта наша, и въ нашу память, чюдо преславно и паче ума человѣка о преподобнѣмъ велицѣмь архиереи святымъ Николою. Въ тысущное и вь 9-десять 6-е лѣто отъ въплощения самого Бога еже вь человѣцѣхь отъ браконеискусомужныа приснодѣвы Богородица Мариа, при цари Гречестѣмь Алексеи Комнинѣ, при патриарсѣ Николѣ Константинаграда, въ лѣта рускыхь князеи, христолюбиваго великаго князя Всеволода Ярославича, въ Киевѣ, и благороднаго сына его, Владимера Манамаха, въ Черниговѣ, въ лѣто отъ сьздания мира 6596 [1088], судомъ убо Божиимъ и промысломь Вышняго, нашедшимъ Измалтяномъ на Греческую область об ону страну моря, отъ Корсуня поля наченше даже и до Антиохиа и до Иерусалима, по всѣмъ градомъ и селомъ ихь вся люди сущаа изсѣкоша, и жены ихъ и чада ихъ плѣниша, имѣние ихъ и домы пожгоша, церкви же и манастыря опустѣша, и грады ихъ приаша вь область свою; тогда же и Лукии сьтвориша пусть, въ немже лежа тѣло святаго Николы, тѣло драгое, тѣло всечестное, тѣло чюдеса дѣа дивнаа и преславная. Не можаше ли убо преподобныи съи мужъ, дабы градъ его и церкви не опустѣла? Но повелѣнию Божию не противяся, но глаголаше: "Господи, угоднаа предъ очима твоима сътворю. Якоже и бысть. Не можааше угодника своего Господь нашь Исусъ Христосъ зрѣти на пустѣ мѣстѣ лежаща мощемъ его и ни отъ кого же славимымъ, но якоже есть писано: прославляющихъ мя, рече, прославлю, и о мнѣ хвалящихся възнесу славу ихь". Бысть убо въ дни сиа прозвитерь благовѣренъ въ Барѣ градѣ, Нѣмеческыа области, христолюбивъ же и праведень, сему явися святыи Николае, глаголя: «Иди и рци людемъ симь и всему сьбору церковному, яко да шедше възмутъ мя отъ Мирскаго града и здѣ положатъ мя, не могу тамо пребывати на пустѣ, Богу тако изволшу», и то рекь отъиде. Утру же бывшу, абие воста прозвитерь, и повѣда всѣмь людемъ бывшее явление святымъ Николою. Си же слышавше, и възрадовашася радостию великою, и глаголаху: «Днесь възвеличилъ есть Господь милость свою на людехъ своихь и на градѣ нашемъ, яко сподобиль ны есть приати угодника его святаго Николу». И ту тако нарядиша мужа благоговѣнны, боящася Бога, въ трехъ кораблехъ ити по святаго. Оны же насыпавше пшеници, творящеся въ куплю, отъидоша, и приидошавъ Антиохию, и спродавше жито, и всю куплю искупивше имъ, что имъ угодно бѣ. Вѣсть же приемше Баряне, яко Венидици ту сущии хотятъ ити прежде ихь и взяти мощи святаго Николы, ускориша Баряне, и отъидоша абие, и приидоша въ Ликию градъ Мирскыи, и присташа въ лимени градстѣмь. Съвѣтъ же сътворше, въземше оружиа внидоша въ церковь святаго Николы, и обрѣтоша въ неи 4 черноризци, и въпросиша ихъ, где лежитъ святыи Николае? И показаша имъ гробъ, идеже лежаше святыи Николае. Они же раскопавше помость церковныи, обрѣтоша раку полну мира, и волиаша миро въ корчагы, а мощи его взяша сь радостию, и несоша ̀и вь корабль свои, и отплуша въ море. Два черньца остаста вь Мирѣхъ, а два идоста съ мощми святаго Николы; и приидоша вь Барь градъ об ону страну моря. Отъидоша отъ Мирскаго града мѣсяца априля вь 11 день, и приидоша въ Баръ градъ мѣсяца маиа 2 день, вь недѣлю, въ годину вечернюю. Видѣвше же баряне, яко приидоша съ мощми святаго Николы отъ Мурь, и изыидоша вси баряне вь стрѣтение его, мужи и жены, и отъ мала и до велика, съсвѣщами и темианомъ, и приаша съ радостию, съ великою честию, и положиша ы въ церкви святаго Иоанна Предтеча при мори. Да послушаите, братиа моа, молю вы, колико чюдесъ сътвори святыи Николае дошедъ града Барска. Въ недѣлю бо вечерь прииде, а заутра вь понедѣлникь исцѣли 40 и 7 болныхь, мужъ и жень, одръжимыхъ различными недугы и болѣзньми: онь главою, а другыи очима, инь рукама и ногама, а другыи сердцемь, или чревною болестию, и всѣмъ тѣломь страждущихъ отъ духь нечистыхъ; а въ вторникь исцѣли 20 и 2 болныхъ, а въ среду исцѣли 29 болящихъ; вь четвертокь, заутра рано, глуха и нѣма суща, имуща уже 5 лѣть въ недузѣ томъ. И посемь явися святыи Николае нѣкоему черноризцу духовну сущу, глаголя тако: «Волею Божиею приидохомъ къ вамъ въ страну сию». Въ день недѣлныи, въ часъ 9, приаша исцѣления 11 человѣкь. Еще же пакы творить по вся дни чюдеса святыи Николае, яко источникъ кыпяи и копца не имыи. Многа же дааниа приношааху кь святому: злато, и сребро и рызы многоцѣнны. Видѣвше же гражане преславная его чюдеса, възрадовашася радостию великою зѣло, и създаша ему церковь преславну, и велику и красну сущу, въ имя святаго преподобнаго отца нашего Николы, сковаша и раку ему сребрену и позлащену. Въ 3-е лѣто пренесениа его отъ Мурь послашася къ Римьскому папѣ Герману, яко да приидетъ сь своими епископы и со всѣмь церковнымъ его клиросомъ, и да принесутъ мощи святаго Николы; и вложиша въ раку сребряну, и вземше епископи съ велможами ихъ , и принесоша въ новую и великую церковь его, и полояжиша въ олтари въ сокровнѣ мѣстѣ, мѣсяца мая въ 2 день; принесоша же и ветхии гробь его, въ немь же бѣ принесень отъ Муръ, и поставиша въ церкви, положиша и кость рукы его отъ мощеи его; многь народъ, людии приходящии поклоняхуся, цѣлующе мощеи его раку. Римскыи же папѣжь Германь, и епископъ, и вси гражане и людие праздникъ великь сътвориша вь тои день на похвалу святому, юже творятъ и до сего дне, и ядоша, и пиша и веселишися въ тыи дни, многа даания даша убогымъ, и тако отъидоша во домы своа съ миромъ, славяще и хваляще Бога и святаго и праведного угодника его Николу. Намъ же, о преблаженне угодниче Христовъ, милостивь буди здѣ и въ будущемъ вѣцѣ; на тя бо уповахомъ и молимся, ты бо всѣхь видимыхъ и невидимыхь честнѣи явися. Блажень по истиннѣ градъ Барскыи и церкви его, въ неи же тя възвеличи Господь Богь, освящень вь правду, освяти бо тя угодника своего Вышнии. Ты бо всѣмъ христианомъ еси помощникь и заступникь, избавляа ны отъ всѣхъ напастии, отъ бѣдъ нашихъ. И еще молимъ ти ся, святыи преблаженныи угодниче святителю Христовь Николае, имаши дрьзновение кь Владьщѣ молити о насъ, празднующихъ выну память твою, творящихъ пренесение твоихъ честныхъ мощии, яко да спасени будемъ твоими молитвами, благодатию и человѣколюбиемь Господа нашего Исуса Христа, емуже купно подобаетъ слава, и честь, и покланение и велелѣпие съ безначалниымъ его Отцемъ, и пресвятымъ и благымъ и животворящимъ Духомъ, нынѣ и въ некончаемыа вѣкы, аминь.